Ҳар қандай келин янги уй остонасидан қадам қўяр экан, ўзини яхши томондан кўрсатишга, ўзидаги бор-йўқ фазилатларни юзага чиқаришга ҳаракат қилади. Қайнона билан тил топишишда қуйидаги маслаҳатларимизга амал қилсангиз, ишларингиз «беш» бўлади.
Меъёрни билинг!
Қайнонангизга, Янги оилангизнинг бошқа вакилларига ёқиш учун ўзингизни ўққа, чўққа урманг. Бунинг учун феълингизни ўзгартириб кўрсатишгача борманг. Ҳаётда қандай бўлсангиз, бу уйда ҳам одатларингизга хиёнат қилманг. Аммо «мен шунақаман» деб бошқаларни назар-писанд қилмаслик ҳам ярамайди.
Камчиликлар учун ўзингизни айбдор ҳис қилманг! Хато қилишдан қўрқманг!
Шу пайтгача сиз умуман бошқача муҳитда, мутлақо бегона тартибда яшагансиз. Янги хонадоннинг тўлақонли аъзоси бўлишингиз учун яна шунча яшашингиз керак. Шундай экан, қайнонангиз овқат тайёрлаш, дазмол қилиш, ҳатто ҳовли супуриш каби юмушларингиздан айб топадиган бўлса, бунинг учун қаттиқ изтироб чекиб юрманг. Шунчаки бу уйда тартиб, таомиллар бошқачароқ. Билмаган юмушларингиз учун ҳам асло хижолат бўлманг. Шунда қайнонангиздан у ёки бу нарса ҳақида сўрашингиз осонлашади.
Таваккал қилманг!
Айтайлик, сиз келин бўлиб тушган хонадонда хуш кўриладиган бирор таомни пиширишни умуман билмайсиз. Ўз ҳолингизча ундан-бундан сўраб, рецептлар асосида тайёрладингиз. Ўхшаса-ку хўп-хўп, айтгандай чиқмаса, минг қўрқув ичида қилган овқатингиздан ўзингизнинг ҳам кўнглингиз тўлмай қолади. Яхши чиқди деганингизда ҳам «онамникидай бўлмабди», деган гапни эшитгандан кўра қандай қилинишини бир оғиз сўрасангиз, қайнонангиз ҳам ичида «келиним билмаганини сўрашдан оғринмайди» деган хулосага келиб, жон деб тажриба алмашади.
Вақтингизни, кучингизни беҳуда сарфламанг!
Уйдаги юмушлар бўладими, бирор жойга меҳмондорчиликка борасизми, ҳамма ишни мукаммал режа асосида олиб боринг. Иложи бўлса, бир ҳафталик ишлар режасини тузиб, кўринадиган жойга осиб қўйинг. Ҳаммасини бир кунда уддалайман, деган хомхаёлдан воз кечинг. Бир юмушни қайта-қайта қилмаслик учун ишга уннашдан олдин энг осон йўли ҳақида ўйлаб кўринг.
Ҳурматга сазовор бўлиш учун «мен»ингизни сақланг!
Сизга бўлган муносабатларда юқоридан гапириладиган, инкорсиз қабул қилишингиз керакдай бўладиган вазиятлар туғилади. Йўлини қилиб, кўнглини оғритмасдан у ёки бу нарса сизга маъқул эмаслигини билдира олинг. Индамай ичга ютиб юраверсангиз, кейинги сафар ундан ҳам оғирроқ ҳолат юзага келса, дилингиз хуфтон бўлади. Изоҳ талаб қилмайдиган маслаҳатимиз: юзингиздан табассум аримасин!
