— Турмуш ўртоғим татар миллатига мансуб, мен эса ўзбекман. Бу йил қизимиз 16 ёшга тўлади. Одатда боланинг миллати отасининг миллатига кўра белгиланади. Аммо қизим паспортига ўзбек миллатига мансублиги ёзилишини истайди. Қизимга биометрик паспорт олаётганимизда ўзбек миллатига мансублигини танлаш ҳуқуқига эгами?
Элвида, Чирчиқ шаҳри
— «Ўзбекистон Республикаси фуқаросининг биометрик паспортини ва 19 ёшга тўлмаган шахслар учун фуқаролиги бўлмаган шахсларнинг ҳаракатланиш ҳужжатини бериш тартиби тўғрисида»ги Низомнинг 21-бандига кўра, паспорт ёки ҳаракатланиш ҳужжатини расмийлаштириш жараёнида боланинг миллати ота-оналарнинг миллати бўйича аниқланади, агар ота-оналар турли миллатларга мансуб бўлсалар, паспорт ёки ҳаракатланиш ҳужжатини беришда фуқаро ёки фуқаролиги бўлмаган шахснинг миллати паспорт ёки ҳаракатланиш ҳужжатини олувчининг хоҳишига кўра отаси ёки онасининг миллати бўйича ёзилади. Демак, қизингиз паспортини расмийлаштираётганда икки миллатдан бирини танлаш ҳуқуқига эга.
