ҚИЙМАТИ 3,7 МИЛЛИАРД СЎМДАН ОРТИҚ КИЙИМ-КЕЧАКНИНГ РЕСПУБЛИКА ҲУДУДИГА НОҚОНУНИЙ РАВИШДА ОЛИБ КИРИЛИШИГА ЧЕК ҚЎЙИЛДИ

Бухоро вилояти божхона бошқармаси “Олот” чегара божхона комплекси ходимлари томонидан темир йўл контейнерида Хитойдан юборилган юклар божхона кўригидан ўтказилди. Текширувлар натижасига кўра, Фарғона шаҳридаги “Намуна савдо минбари” масъулияти чекланган жамияти номига юборилган йирик миқдордаги товар-моддий бойликларнинг ноқонуний равишда олиб кирилаётгани аниқланди.

Йўл-юк кузатув ҳужжатларига кўра, ушбу контейнерда қиймати 4,5 минг АҚШ долларини ташкил қилувчи 25 тонна 800 килограмдан ортиқ оғирликдаги кафель бўлиши керак эди. Аммо ушбу товарлар ўрнига ҳужжатларда умуман кўрсатилмаган, қиймати 3,7 миллиард сўмдан ортиқ кийим-кечак борлиги аниқланди. Қонунбузарлар бу хатти-ҳаракати билан давлат бюджетига ундирилиши лозим бўлган 4 миллиард сўмдан ортиқ божхона тўловларидан бўйин товлаган.

Маълумки, амалдаги тартибларга мувофиқ, Ўзбекистон Республикасининг божхона чегараси орқали олиб ўтилаётган товарларни декларация қилмаслик ёки нотўғри декларациялаш, яъни товарлар, уларнинг божхона режими ва бошқалар ҳақида божхона мақсадлари учун зарур бўлган белгиланган ёзма, оғзаки ёки бошқа шаклдаги маълумотларни бермаслик ёки нотўғри маълумотлар бериш белгиланган тартибда жавобгарликка тортишга асос бўлиб хизмат қилади.

Бундан ташқари, хорижий фуқаро А.Абдулкеххар бошқарувида Туркиядан мамлакатимизга етиб келган юк автотранспорт воситаси ҳам ўрнатилган тартибда божхона кўригидан ўтказилганда навбатдаги божхона қоидабузарлиги фош бўлди.

Йўл-юк кузатув ҳужжатларига кўра, Тошкент шаҳридаги “Endless Business LLC” корхонаси номига келтирилаётган юклар аслида қиймати 20 минг АҚШ долларини ташкил қилувчи 23 тоннадан ортиқ қурилиш материаллари бўлиши лозим эди.

Аммо, божхона кўриги давомида контейнердаги товарлар билан йўл-юк кузатув ҳужжатларидаги маълумотлар ўртасида тафовут мавжудлиги, мазкур товарлар ҳужжатлардагидан ортиқча миқдорда эканлиги аниқланди. Ҳисоб-китобларга кўра, йўл-юк кузатув ҳужжатларида қайд этилмаган қурилиш материалларининг умумий қиймати 648 миллион сўмни ташкил қилди.

Ҳозир ушбу товарлар вақтинча сақловга олиб қўйилди ва мазкур ҳолат юзасидан божхона текширувлари ва суриштирув ҳаракатлари олиб борилмоқда.