“Арсенал” жамоаси ярим ҳимоячилари Алекс Окслейд-Чемберлен ва Месут Ўзил ўз фаолиятларини бошқа клубда давом эттириши мумкин. Бу ҳақда The Telegraph нашри маълум қилди.
Маълум бўлишича, Ўзил клуб билан шартномасини узайтиришга тайёр эмас. Германиялик футболчи жамоа натижаларидан қониқмаяпти ва ёзда кетиши мумкинлигини яқинларига айтган.
“Арсенал” раҳбарияти Окслейд-Чемберленга янги шартнома таклиф қилмади. Ярим ҳимоячининг амалдаги келишуви 2018 йил ёзида тугайди. Шу сабабли у эркин агентга айланмасдан олдин клубдан кетмоқчи.
Аввалроқ Алексис Санчес “Арсенал”да бахтиёр эмаслигини билдириб, клубдан кетиш нияти бор эканини айтган.
