Москва полицияси “Сокольники” хиёбонига ўрнатилган тилла суви югуртирилган ҳайкални севган қизига совға қилиш учун ўғирлаган йигитни қўлга олди, деб хабар берди “Тjournal.ru” нашри.
Мазкур ҳайкалнинг йўқолганлиги ҳақида полицияга хиёбон хавфсизлик хизмати ходими хабар берди. Ҳуқуқ-тартибот идораси ходимлари жиноят содир этилган жой яқинида ўғрини қўлга олди. Йигит четга чиқмаслик ҳақида тилхат ёзиб берди, унга нисбатан ўғирлик бўйича жиноят иши қўзғатилди.
“Бухгалтерга ёдгорлик” деб аталувчи ҳайкал 2014 йилнинг июнь ойида “Сокольники” хиёбонига ўрнатилган. Унда елкасида қаноти бўлган, қўлида бухгалтерлик ҳисоботини кўтариб олган қиз тасвирланган. Экспертлар ҳайкалнинг нархини уч миллион рубль, деб баҳолади.
