Ўзбекистон Республикасининг Биринчи Президенти Ислом Каримов ва Давлатимизнинг амалдаги Президенти Шавкат Мирзиёев 2016 йил халқаро ҳаётнинг 40 нафар ҳал қилувчи шахслари рўйхатига киритилди. Мазкур рўйхат Испаниянинг етакчи аналитика марказлари – Барселона халқаро муносабатлар Маркази томонидан нашр этилган (CIDOB).
Ҳар йили тузиладиган мазкур рўйхатга дунёнинг мухим сиёсат ва жамоат арбоблари киритилади.
2016 йилги рўйхатга Ўзбекистоннинг Биринчи ва амалдаги Президентлари киритилди. Рўйхат тузувчилари атоқли давлат ва сиёсат арбоби бўлган Ислом Каримов мустақил Давлатнинг асосчиси саналиб, Ўзбекистонни Собиқ совет тузумидан сўнг оёққа туришида асосий роль ўйнаган шахс эканлигини қайд этган.
Ҳаётини Ватани ва халқига хизмат қилишга бағишлаган Ўзбекистоннинг Биринчи Президентига берилган бундай юксак баҳо унинг хотирасига бўлган ҳурматнинг яна бир ифодаси бўлди.
CIDOB экспертлари бир вақтнинг ўзида, Ўзбекистоннинг тажрибали Бош вазири Шавкат Мирзиёев Президент сайловларида 88 фоиздан ортиқ овоз билан ишончли ғалаба қозонганини ҳам қайд этган. Президент Шавкат Мирзиёев раҳбарлигда Ўзбекистон сиёсатида янги истиқболларни кутиш мумкин, дея қайд этади испаниялик шарҳловчилар.
Мазкур рейтинг Ўзбекистоннинг халқаро майдонда нуфузи ортиб бораётганлигидан, шунингдек мамлакатимизнинг эришган ютуқларини дунё ҳамжамияти томонидан тан олинаётганлигидан далолат беради, деб ёзади “Жаҳон” АА.
