Халқаро молия ташкилотлари билан амалга оширилаётган миллиардлаб лойиҳаларда маҳаллий компаниялар иштироки етарли эмаслиги танқид қилинди. Эндиликда уларни халқаро тендерларга тайёрлаш бўйича янги тизим жорий этилади.
Қайд этилишича, бугунги кунда 20 миллиард доллардан ортиқ инфратузилма лойиҳалари амалга оширилмоқда. Бироқ ҳатто юқори рейтинг, етарли маблағ ва техникага эга маҳаллий қурувчилар ҳам ушбу бозорда тўлиқ иштирок эта олмаяпти, аксарияти субпудратчи сифатида қолиб кетмоқда.
Мутасаддилар ва буюртмачи идоралар халқаро молия ташкилотлари билан музокараларда маҳаллий компаниялар имкониятларини етарлича намойиш эта олмаётгани, шартномаларда уларнинг манфаатларини ҳимоя қилмаётгани танқид қилинди. Шунингдек, халқаро тендер шартлари ўргатилмагани сабаб, энг арзон таклиф берган корхоналар ҳам рақобатда ютқазаётгани қайд этилди.
Шу муносабат билан маҳаллий лойиҳачи, қурувчи ва консультантларни халқаро тендерларда қатнашишга ўқитиш тизимини яратиш вазифаси белгиланди. Шу билан бирга, айрим қурувчилар қўшни давлатлардаги халқаро лойиҳаларда бош пудратчи сифатида иштирок эта бошлагани ижобий баҳоланди.
