Эрон Яқин Шарқдаги урушни тўхтатиш масаласида АҚШ ва Исроилга бир қатор кескин шартлар илгари сурди. Бу ҳақда The Wall Street Journal хабар берди.
Маълум қилинишича, воситачилар томонидан музокараларни йўлга қўйишга уринишлар давом этмоқда, бироқ томонлар ўртасида жиддий келишмовчиликлар сақланиб қолмоқда. Асосий масалалардан бири – Ҳормуз бўғози бўлиб, ҳозирда Эрон уни ёпгани ва айрим кемалар ҳужумларга учраётгани айтилмоқда.
Эрон томони бўғоз орқали ўтувчи кемалардан тўлов ундириш, уруш қайта бошланмаслигига кафолат олиш, “Ҳизболлоҳ”га қарши зарбаларни тўхтатиш, Форс кўрфазидаги АҚШ базаларини ёпиш ҳамда етказилган зарар учун компенсация тўлашни талаб қилмоқда.
АҚШ эса ўз навбатида Эрондан ракета дастурини тўхтатиш, уранни бойитишдан воз кечиш, минтақавий гуруҳларни қўллаб-қувватлашни тўхтатиш ва Ҳормуз бўғозини шартсиз очишни талаб қилган. Бу позицияни АҚШ президенти Дональд Трамп ҳам тасдиқлаган.
Шу билан бирга, Қатар ва Уммон воситачилик жараёнида фаол иштирок этмоқда, Туркия ва Покистон ҳам алоҳида музокаралар олиб бормоқда.
Дипломатик саъй-ҳаракатларга қарамай, томонлар позициялари ўртасидаги фарқ катта бўлиб қолмоқда ва тез орада келишувга эришиш эҳтимоли паст деб баҳоланмоқда.
