Яқин Шарқдаги вазият фонида Европа бозорида энергия ресурслари нархи ошди. АҚШ ва Исроил операцияси бошланганидан сўнг Европада газ нархи қарийб 50 фоизга кўтарилган. Шунингдек, Brent русумидаги нефть нархи 2024 йил июлидан бери илк бор баррели 83 доллардан ошди.
Эстония ва Литвада АИ-95 бензини нархи бир неча соат ичида ўнлаб центга қимматлаётгани қайд этилмоқда. Германияда эса 27 февралдан буён 50 литрли бакни тўлдириш қиймати 6–9 еврога ошган.
Украинада ҳам ёқилғи бозорида кескин ўзгариш кузатилмоқда: ҳафта бошидан бери бензин нархи 20 фоизга ошган. 3 март куни бир кечада нарх 2 гривнага кўтарилган. АЁҚШларда ҳайдовчилар эрталабдан навбатга туриб, эҳтимолий қимматлашувдан олдин бакларни тўлдиришга уринмоқда.
Молдовада эса АИ-95 бензини бир литри қарийб 30 лейга етди — бу сўнгги бир йилдаги энг юқори кўрсаткич. Дизель ёқилғиси эса 21,21 лейгача кўтарилган. Расмий маълумотларга кўра, мамлакат омборларида бензин захираси 23 кунга, дизель 13 кунга ва табиий газ 24 кунга етади.
