Қирғизистон парламенти — Жогорку Кенеш собиқ спикери Нурланбек Турғунбек ўғли депутатлик ваколатини муддатидан олдин топширишини маълум қилди. У бу ҳақдаги қарорини Facebook саҳифаси орқали эълон қилди.
Собиқ спикер қирғизистонликларни Рамазон ойи билан табриклар экан, сўнгги кунларда ўзининг сиёсий фитналар ҳамда “75 кишининг мурожаати”га алоқадорлиги ҳақидаги хабарларни рад этди. Унинг айтишича, жамоатчиликда резонанс келтириб чиқарган мактуб у Туркияда бўлган пайтда эълон қилинган ва бу ҳақда кейинроқ хабар топган.
Нурланбек Турғунбек ўғли сўнгги вақтларда соғлиғи ёмонлашгани сабаб даволанаётганини, шу боис депутатлик мандатини топшириб, сиёсатдан кетишга қарор қилганини билдирди. У сайловчиларига билдирилган ишонч учун миннатдорлик билдириб, парламентдан муддатидан олдин кетаётгани учун узр сўради.
Эслатиб ўтамиз, аввалроқ 75 нафар жамоат арбоби ва амалдор Садир Жапаров номига мурожаат йўллаб, мамлакатда муддатидан олдин президентлик сайловларини ўтказишни сўраган эди. Кейинчалик ушбу мурожаат ортидан бир қатор ҳибслар ва юқори лавозимли амалдорларнинг истеъфоси кузатилган.
