АҚШнинг 13 штати Дональд Трамп маъмуриятига қарши даъво аризаси киритди. Бунга “яшил” энергия лойиҳалари учун ажратилган 1,2 миллиард долларлик грантларнинг бекор қилингани сабаб бўлган.
Даъво Калифорния, Колорадо, Вашингтон, Коннектикут, Иллинойс, Мэриленд, Массачусетс, Нью-Жерси, Нью-Йорк, Орегон, Род-Айленд, Вермонт ва Висконсин штатлари томонидан киритилган. Калифорния губернатори Гэвин Ньюсом мазкур қарорни “ноқонуний” деб атаб, бу 200 мингдан ортиқ иш ўрнига хавф солиши ва миллиардлаб долларлик иқтисодий самарани йўққа чиқаришини таъкидлади.
Даъвогарлар фикрича, Конгресс томонидан маъқулланган маблағларни бекор қилиш мамлакат Конституциясига зид ҳисобланади. Аввалроқ АҚШ суди ҳам “яшил” энергия лойиҳалари учун ажратилган бир неча миллиард долларлик грантларни бекор қилиш қарорини қонунга хилоф деб топган эди.
