Самарқанд вилояти божхона бошқармаси ходимлари томонидан қарийб 800 грамм опийни яширин олиб киришга уриниш фош этилди. Ҳолат юзасидан жиноят иши қўзғатилган.
Маълум қилинишича, Контрабандага қарши курашиш бўлими ва “Жартепа” чегара божхона пости ходимлари қўшни давлатдан кириб келган йўловчилардан бирини шубҳа асосида текширган. Сканер орқали ўтказилган кўрикда аёлнинг ички аъзоларига 3 дона ўрам яширилгани аниқланган.
Шифокорлар иштирокида ўрамлар очиб кўрилганда, уларнинг ичидан жами 255 грамм опий моддаси топилган. Мазкур шахсга ҳамроҳлик қилган турмуш ўртоғи ҳам тезкор кузатувга олиниб, тиббий муассасада кўрикдан ўтказилган.
Кўрик давомида эркакнинг ички аъзоларидан 4 дона ўрам чиқариб олинган бўлиб, уларда 541 грамм опий борлиги аниқланган. Натижада “жонли контейнер” усулида жами 796 грамм опий моддасини олиб киришга уринишнинг олди олинди, тергов ҳаракатлари давом этмоқда.
