8 январь куни Қувайтда Франция Суперкубоги финал учрашуви бўлиб ўтди. Унда “Пари Сен-Жермен” ва “Марсел” клублари ўзаро баҳс олиб борди.
Учрашувнинг 13-дақиқасида Усмон Дембеле ҳисобни очди ва ПСЖ биринчи бўлимни минимал устунлик билан якунлади.
Иккинчи бўлимда “Марсел” фаоллашди. 76-дақиқада Мейсон Гринвуд ҳисобни тенглаштирди, 87-дақиқада эса Вилян Пачо автоголи эвазига марселликлар олдинга чиқиб олди. Бироқ асосий вақтга қўшиб берилган дақиқаларда Гонсало Рамос гол уриб, ўйинни пенальтилар сериясига олиб чиқди.
Пенальтилар сериясида “Пари Сен-Жермен” 4:1 ҳисобида ғалаба қозониб, Франция Суперкубогини қўлга киритди. Шу тариқа ПСЖ ушбу совринни 14-марта қўлга киритиб, мусобақа тарихидаги энг муваффақиятли клуб сифатидаги етакчилигини мустаҳкамлади. Клуб энг яқин таъқибчиси “Лион”дан бу кўрсаткич бўйича анча илгарилаб кетган.
