Маълум қилинишича, Тожикистон Республикасидан Ўзбекистонга кириб келган “Ласетти” русумли автотранспорт воситаси Давлат хавфсизлик хизмати Чегара қўшинлари ҳарбий хизматчилари, Фарғона вилояти бўйича ДХХ бошқармаси ҳамда Божхона органлари ходимлари ҳамкорлигида синчковлик билан текширилган. Автомашинани Ўзбекистон туманида яшовчи, 1979 йилда туғилган фуқаро бошқариб келган.
Текширув жараёнида транспорт воситасининг ёқилғи баки ичига яширилган ҳолда соф оғирлиги 10 кг 739 грамм “гашиш”, 412 грамм “марихуана”, 35 грамм “опий” ҳамда 6945 дона “Royal” номли кучли таъсир қилувчи дори воситалари борлиги аниқланган. Барча ашёвий далиллар белгиланган тартибда расмийлаштириб олинган.
Ҳолат юзасидан мазкур шахсга нисбатан Жиноят кодексининг 246-моддаси 2-қисми ҳамда 25, 273-моддаси 5-қисми билан жиноят иши қўзғатилиб, унга нисбатан “қамоқ” эҳтиёт чораси қўлланилган.
Айни пайтда тергов ҳаракатлари давом эттирилиб, гумонланувчининг жиноий алоқаларини аниқлаш бўйича зарур чора-тадбирлар амалга оширилмоқда.
