2026 йил 1 январдан бошлаб қишлоқ хўжалиги товар ишлаб чиқарувчилари томонидан етиштирилган маҳсулотларнинг (пахта ва ғалла бундан мустасно) реализацияси учун қўшилган қиймат солиғи (ҚҚС) “нол” ставкаси жорий қилинади.
Бу бўйича Президентнинг “Қишлоқ хўжалиги соҳасида қўшилган қиймат солиғини ҳисоблашнинг соддалаштирилган тартибини жорий этиш чора-тадбирлари тўғрисида”ги фармони (ПФ–153-сон, 04.09.2025 й.)да белгиланган.
Шунингдек:
Қишлоқ хўжалиги маҳсулотлари рўйхати Қишлоқ хўжалиги вазирлиги ва Солиқ қўмитаси томонидан тасдиқланиб, расмий веб-сайтларда эълон қилинади.
Рўйхатга киритилган маҳсулотлар учун харид қилинган товарлар ёки хизматлар бўйича тўланган ҚҚС суммаси 3 кун ичида автоматлаштирилган тарзда қайтарилади.
Солиқ қўмитаси электрон ҳисобварақ-фактураларни реал вақт режимида хавф даражасига қараб таҳлил қилиш тизимини жорий қилади.
Юқори хавфли ҳисобварақ-фактуралар улуши 10% дан ошмаслиги ва ҚҚС суммаси фақат тўлиқ тўлангандан кейин ҳисобга олиниши белгиланди.
Космик тадқиқотлар ва технологиялар агентлиги Space Gov Monitoring платформаси орқали қишлоқ хўжалиги ерларидаги экин майдонлари бўйича маълумотларни мунтазам етказиб боради.
