Путин ўз нутқида Россия армияси жангчилари ва қўмондонларини табриклаб, улар “она замин, ҳақиқат ва адолат учун курашиш масъулиятини зиммасига олганини” айтди. Президент ҳарбийларни “сўзда ҳам, амалда ҳам” қўллаб-қувватлашини билдириб, “Сизларга ва ғалабамизга ишонамиз!” дея мурожаатини якунлади.
Мурожаатнинг қолган қисми одатий руҳда кечди. Путин Россиянинг “минг йиллик тарихи”ни эслаб, фуқароларни бирдамликка чақирди. Унинг таъкидлашича, айнан бирлик мамлакатнинг суверенитети, хавфсизлиги ва келажагини белгилайди.
Шу билан бирга, Россия президенти Украинадаги урушда РФ қуролли кучларининг йўқотишлари ҳақида лом-мим демади. ББC рус хизмати ва “Медиазона” маълумотларига кўра, 2025-йил декабр ўрталарига келиб урушда ҳалок бўлган 155 мингдан ортиқ россиялик ҳарбийнинг шахси аниқланган.
Экспертлар эса реал йўқотишлар бундан анча юқори — 200–300 мингдан ортиқ бўлиши мумкинлигини таъкидламоқда.
