Фарғона вилоятининг Бешариқ туманида суд бошқарувчиси ёрдамчисининг коррупцион жинояти аниқланди. Бу ҳақда ҳуқуқни муҳофаза қилувчи органлар маълум қилди.
Маълум бўлишича, фаолияти тўхтатилган минерал ўғитлар улгуржи савдоси билан шуғулланувчи ишлаб чиқариш кооперативига бириктирилган суд бошқарувчиси ёрдамчиси минерал ўғитлар ишлаб чиқарувчи МЧЖнинг мазкур кооперативдаги 1 млрд 502 млн сўмлик қарзидан 300 млн сўмини ундириб бериш эвазига 4 минг АҚШ доллари талаб қилган.
Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбир давомида у 48 млн сўм пул маблағини олган вақтида ашёвий далиллар билан ушланган.
Ҳозирда ушбу шахсга нисбатан Жиноят кодексининг 168-моддаси 3-қисми “в” банди билан жиноят иши қўзғатилиб, тергов ҳаракатлари олиб борилмоқда.
