Президент Шавкат Мирзиёевнинг Олий Мажлис ва Ўзбекистон халқига Мурожаатномаси бошланди
Президент Шавкат Мирзиёев Олий Мажлис ва Ўзбекистон халқига мурожаатномасида 2025 йил мамлакат учун муҳим иқтисодий ютуқлар билан якунланганини таъкидлади.
Давлат раҳбарига кўра, жаҳон бозорларида беқарорлик кучайган, ишлаб чиқариш ва логистика занжирлари узилган шароитда ҳам Ўзбекистон иқтисодиёти барқарор ўсишни сақлаб қолди. Бу натижалар халқаро ҳамжамият ва нуфузли ташкилотлар томонидан ижобий баҳоланмоқда.
Қайд этилишича, 2025 йилда Ўзбекистон ялпи ички маҳсулоти тарихда илк бор 145 миллиард доллардан ошди. Таққослаш учун, бор-йўғи тўққиз йил аввал иқтисодиёт ҳажмини 100 миллиард долларга етказиш катта марралардан бири ҳисобланган.
Шунингдек, экспорт ҳажми 23 фоизга ошиб, 33,4 миллиард долларни ташкил этди (олтинсиз — 23,5 миллиард доллар). Олтин-валюта захиралари эса илк бор 60 миллиард доллардан ошиб, мамлакат ислоҳотлари учун мустаҳкам молиявий таянчга айланди.
