Президент Шавкат Мирзиёевнинг 25 декабрдаги фармойишига мувофиқ, қатор судьяларга нисбатан кадрлар бўйича қарорлар қабул қилинди.
Судьялар олий кенгаши маълум қилишича, Акмал Шукуров иши бўйича апелляция инстанциясида қарор чиқарган судья Мирзажонов Муроджон Қодирович қонунийликни бузгани сабаб судьялик ваколатларидан маҳрум этилди ва Тошкент шаҳар суди раисининг ўринбосари лавозимидан озод қилинди.
Шу иш доирасида апелляция судлов ҳайъати аъзолари бўлган яна уч нафар судья ҳам ёзма аризалари ва қонунбузарликка йўл қўйгани учун лавозимидан озод этилди.
Шу билан бирга, Фарҳоджон Ғаниев Тошкент шаҳар суди раисининг ўринбосари этиб тайинланди, Муроджон Абабакиров эса Андижон вилоят суди раисининг ўринбосари лавозимига ўтказилди.
Эслатиб ўтамиз, Акмал Шукуров иши жамоатчиликда катта муҳокамаларга сабаб бўлган ва мазкур ҳолат юзасидан хизмат текшируви тайинланган эди.
