Покистонда собиқ бош вазир Имрон Хон ва унинг рафиқаси Бушра Биби коррупция билан боғлиқ жиноят иши бўйича 17 йилга озодликдан маҳрум этилди, дея ёзмоқда "zamon.uz".
Покистон Федерал қидирув агентлигининг махсус суди 20 декабрь куни эълон қилган ҳукмга кўра, Имрон Хон ва Бушра Бибига давлат совғаларини арзонлаштирилган нархларда сотиб олиш орқали қонунни бузганлик айби қўйилди. Суд қарорига биноан, уларга 10 йил ишончни суиистеъмол қилиш, 7 йил эса коррупцияга қарши қонунчиликни бузиш моддаси асосида жазо тайинланди. Шунингдек, эр-хотинга йирик миқдорда жарима жазоси ҳам белгиланди.
Мазкур иш Саудия Арабистони валиаҳд шаҳзодаси Муҳаммад бин Салмон томонидан расмий ташрифлар чоғида Имрон Хонга совға қилинган ҳашаматли соатлар билан боғлиқ. Прокуратура маълумотларига кўра, ушбу совғалар давлат мулки ҳисобланган бўлиб, уларни белгиланган тартибдан четга чиққан ҳолда жуда паст нархларда сотиб олиш орқали давлат бюджетига бир неча миллион рупий миқдорида зарар етказилган.
Имрон Хон 2023 йил август ойидан буён қамоқда сақланмоқда. У аввалроқ ер билан боғлиқ бошқа коррупция иши бўйича 14 йилга ҳукм қилинган. Маълум қилинишича, янги 17 йиллик жазо муддати аввалги жазони ўтаб бўлгач кучга киради.
Собиқ бош вазирнинг адвокатлари суд қарорини адолатсиз дея баҳолаб, ҳукм ҳимоя томонининг далиллари тўлиқ кўриб чиқилмасдан чиқарилганини билдирди. Имрон Хон мазкур қарор устидан Исломобод Олий судига апелляция бериш ниятида.
Хоннинг сиёсий партияси ушбу жиноят ишларини сиёсий босим ва танлаб жазолашнинг бир кўриниши сифатида баҳоламоқда.
