Россия Украинага қарши урушда иштирок этиш учун Ҳиндистоннинг 200 нафардан ортиқ фуқаросини ёллагани маълум бўлди. Бу ҳақда BBC нашри The Indian Expressга таяниб хабар берди.
Расмий маълумотларга кўра, ҳозиргача 100 нафардан ортиқ ҳиндистонлик ватанга қайтарилган. Айни пайтда Москва билан яна қарийб 50 нафар фуқарони Ҳиндистонга олиб келиш бўйича музокаралар олиб борилмоқда.
Жабрланганларнинг яқинлари ёллаш жараёни воситачилар орқали амалга оширилганини айтмоқда. Уларнинг сўзларига кўра, ёшлар Россияда юқори маошли, қонуний иш ва қулай яшаш шароитлари ваъдаси билан жалб қилинган, бироқ Россияга боргач, мазмунини тушунмаган рус тилидаги шартномаларни имзолашга мажбур бўлган ва жанговар ҳудудга юборилган.
Маълум қилинишича, Россия томонида урушда нафақат ҳиндистонликлар, балки Непал, Сомали, Сурия, Куба, Сербия, Шри-Ланка, Хитой ҳамда айрим Марказий Осиё давлатлари фуқаролари ҳам ёлланма жангчи сифатида қатнашмоқда.
