Браун университети ва Массачусетс технология институтида (МИТ) юз берган отишмалар фонида АҚШ президенти Доналд Трамп 18 декабрь куни “грин карта” (Diversity Visa) лотереяси дастурини вақтинча тўхтатиш бўйича топшириқ берди. Бу ҳақда АҚШ ички хавфсизлик вазири Кристи Ноэм Х ижтимоий тармоғида маълум қилди.
Унга кўра, президент топшириғига асосан АҚШ Фуқаролик ва иммиграция хизмати (УСCИС) мазкур дастурни тўхтатган. Қарор Браун университетидаги отишмада гумон қилинган шахс айнан ушбу дастур орқали АҚШга киргани сабабли қабул қилинган.
“Бу даҳшатли жиноятни содир этган шахс умуман мамлакатимизга киритилмаслиги керак эди”, — дея таъкидлади вазир.
Маълумот учун, Diversity Visa дастури ҳар йили АҚШда кам вакилликка эга бўлган давлатлар фуқаролари учун лотерея асосида 50 мингтагача доимий яшаш ҳуқуқини беради. Ушбу давлатларнинг катта қисми Африка қитъасида жойлашган.
2025-йилги лотереяда қарийб 20 миллион киши иштирок этиш учун ариза топширган. Ғолиблар ва уларнинг турмуш ўртоқларини қўшиб ҳисоблаганда, 131 мингдан ортиқ киши танлаб олинган. Бироқ улар АҚШга киришдан олдин мажбурий хавфсизлик ва ҳужжат текширувларидан ўтиши лозим.
