Тошкент шаҳар судининг тафтиш ҳайъати 18 декабрь куни прокуратура протестини қаноатлантириб, Акмал Шукуровни озодликка чиқарган апелляция инстанцияси ажримини бекор қилди. Натижада биринчи инстанция суди ҳукми ўзгартирилди ва Шукуров яна қамоққа олинди.
Суд қарорига кўра, унга Жиноят кодексининг 104-моддаси (қасддан оғир тан жароҳати етказиш) ва 277-моддаси (безорилик) бўйича тайинланган жазолар сақлаб қолинди. Жазоларни қисман қўшиш йўли билан Шукуров 6 йил муддатга озодликдан маҳрум этилди. Қамоқда бўлган кунлар ҳисобга олиниб, у 5 йил 3 ой 12 кун жазони ўташи белгиланди.
Маълумот учун, Акмал Шукуров жорий йил март ойида тунги клуб олдидаги жанжалда эркакни уриб, комага тушириб қўйгани учун судланган эди. Апелляция суди уни 9 декабрь куни озодликка чиқарган, бироқ бу қарор устидан прокуратура протест киритган.
