Жиззах вилояти Зомин туманида жойлашган машҳур осма кўприк ва унга боғлиқ хизмат кўрсатиш объектлари 23 декабрь куни электрон аукцион орқали сотувга қўйилади. Савдога кўприк, ресторан, кафе, савдо дўконлари ва бошқа инфратузилма объектлари чиқарилган.
Объектлар учун бошланғич нарх 149,3 млрд сўм қилиб белгиланган. Умумий майдони 22,1 минг квадрат метрни ташкил этувчи комплекс “Турон Plaza Hotel” МЧЖ буюртмаси билан сотувга қўйилган бўлиб, компаниянинг ягона таъсисчиси “Туронбанк”дир.
Зоминдаги осма кўприк 2023 йилда фойдаланишга топширилган ва қисқа вақт ичида ҳудудий ҳамда республика миқёсида машҳурликка эришган. Кўприк узунлиги 305 метр, баландлиги 150 метр бўлиб, бир вақтнинг ўзида 600 кишини кўтара олади. Мутахассислар фикрича, объектнинг аукционга чиқарилиши хусусий инвесторлар учун туризм ва дам олиш инфратузилмасига кириш имкониятини кенгайтиради.
