Нафақа индексига кўра, Греция яшаш харажатлари, соғлиқни сақлаш сифати ва мослашувчан резидентлик шароитлари билан етакчилик қилди.
2026-йилги рейтингда Жанубий Европанинг қуёшли мамлакати Греция биринчи ўринни эгаллади. Индекс нафақахўрлар учун муҳим бўлган яшаш нархлари, тиббий хизматлар сифати, уй-жой бозори, виза талаблари, иқлим ва маҳаллий муҳитга мослашиш қулайлиги каби мезонлар асосида тузилган.
Нашрга кўра, Греция меҳмондўст жамияти, нисбатан арзон ҳаёт тарзи ҳамда резидентлик олиш имкониятлари билан ажралиб туради. Хусусан, мамлакатдаги “Олтин виза” дастури камида 250 минг евролик кўчмас мулк сармояси эвазига яшаш рухсатномасини олишга имкон беради.
Аввалги йилларда рейтингда етакчи бўлиб келган Португалия ва Испания эса виза чекловларининг кучайиши ҳамда яшаш харажатларининг ошиши сабаб юқори поғоналарни бой берди. Рўйхатдан, шунингдек, Италия, Малайзия ва Франция ҳам ўрин олган.
