“Asia Plus” хабар беришича, айни пайтда мамлакат суткасига 2 млн кВт/соатгача электр энергияси олаётгани маълум қилинган. Ўзбекистон энергетика тизими имкониятлари кенгайган тақдирда, етказиб бериш ҳажми ҳам оширилиши режалаштирилган.
Шунингдек, Тожикистон Энергетика вазирлиги Қозоғистон ва Туркманистондан электр энергияси етказиб бериш бўйича энергетика вазирлари даражасида дастлабки келишувларга эришилганини маълум қилган. Ҳозирда ушбу давлатлардан етказиб бериш билан боғлиқ техник масалалар ҳал этилаётгани айтилмоқда.
Тожикистон ташқи бозорларга фақат мамлакатнинг жануби-ғарбий қисми орқали — Ўзбекистон 500 кВли “Регар-Гузар” юқори кучланишли электр узатиш линияси орқали чиқиши мумкин. Туркманистон ва Қозоғистон энергиясини транзит қилиш учун Ўзбекистон энергетика тизимининг ўтказиш қобилиятини инобатга олиш талаб этилади.
Марказий Осиё Бирлашган энергетика тизими (БЭТ) доирасида Тожикистон энергетика тизимининг параллел ишлаши республика шимолидаги электр линиялари минтақавий “энергия ҳалқаси”га уланганидан сўнг йўлга қўйилади. Республика БЭТга тўлиқ қўшилиши 2026 йилнинг биринчи чорагида кутилмоқда.
Шу билан бирга, Тожикистонда сентябр охиридан бери электр таъминотида чекловлар қўлланиб келаётгани қайд этилган. Бюджет ташкилотлари ва давлат корхоналари соат 18:00 дан кейин электрсиз қолади, кўча ёритиш тизимлари ва электромобиллар учун қувватлаш станциялари белгиланган вақтда ишламайди. Аҳоли эса эрталаб ва кечқурун бир неча соатлик таъминотга эга бўлган.
Таъкидланишича, Душанбе шаҳрида ҳам аҳоли вақт-вақти билан бир неча соат чироқсиз қолмоқда.
