“The Telegraph” хабарига кўра, самолёт Тинч океани соҳилида жойлашган Акапулко шаҳридан парвоз қилган ва Мехикодан тахминан 50 километр ғарбдаги Сан-Матео-Атенко саноат ҳудуди яқинида қулаган.
Маълум қилинишича, учиш аппарати футбол майдонига қўнишга ҳаракат қилган, аммо яқин атрофдаги корхонанинг металл томига урилиб кетган. Натижада кучли ёнғин келиб чиққан.
Штат Фуқаро муҳофазаси координатори Адриан Эрнандеснинг айтишича, самолётда саккиз нафар йўловчи ва икки нафар экипаж аъзоси бўлган. Ҳалокатдан кейин камида етти нафар инсоннинг жасади топилган.
Ёнғин сабаб атрофдаги ҳудуддан 130 нафарга яқин аҳоли эвакуация қилинган. Ҳодиса сабаблари ҳозирда ўрганилмоқда.
