Келаси йил январь ойида Япония 1973 йилдан буён илк бор пандаларсиз қолиши мумкин. Мамлакатда қолган сўнгги гигант пандалар — Токио шаҳридаги Уэно ҳайвонот боғида яшовчи эгизаклар Сяо-Сяо ва Лей-Лей 2026 йил январь ойида Хитойга қайтарилади. Бу ҳақда Kyodo хабар берди.
Маълум қилинишича, февраль ойида пандаларни ижара қилиш муддати якунланади. Жорий йил июнь ойида эса Вакаяма префектурасидаги “Adventure World” боғидан тўртта панда Хитойга қайтарилган эди. Шундан сўнг Японияда фақат Уэно ҳайвонот боғидаги эгизак пандалар қолган.
Қайд этилишича, бу жараён Токио ва Пекин ўртасидаги дипломатик муносабатлар кескинлашуви билан ҳам боғлиқ. Тайвань атрофидаги вазият юзасидан Япония раҳбарияти баёнотлари ортидан томонлар ўртасида ўзаро норозилик ноталари алмашилган, шунингдек, Хитой Японияга сафарлар бўйича чекловлар жорий этган.
Муносабатлар совуқлашуви фонида Хитой авиакомпаниялари Японияга рейслар учун чипталарни бепул қайтариш имкониятини таклиф қилган, Хитойда эса япон маданий тадбирлари ва фильмлар намойиши бекор қилина бошланган.
