Жанубий Кореянинг собиқ президенти Юн Сок Ёл 2024 йил декабрь ойида мамлакатда ҳарбий ҳолат жорий этишни оқлаш мақсадида Шимолий Кореяни агрессияга ундашга ҳаракат қилган. Бу ҳақда махсус прокурор Чо Ин Сок маълум қилди.
Жанубий Кореяда ҳарбий ҳолат жорий этишга уриниш билан боғлиқ ишни олиб бораётган махсус прокурор Чо Ин Сокнинг маълум қилишича, собиқ президент Юн Сок Ёл КХДР томонидан ҳарбий тажовузни қўзғатиш орқали ўз ҳаракатларига сиёсий ва ҳуқуқий асос яратишни режалаштирган.
Reuters агентлигига кўра, прокурорнинг таъкидлашича, Юн Сок Ёл бу йўл билан ҳарбий ҳолат эълон қилишни оқлаш ҳамда сиёсий рақибларини четлатишга умид қилган. Тергов доирасида исёнда иштирок этган, деб гумон қилинган 24 нафар шахсга, жумладан, собиқ президентнинг ўзи ва собиқ ҳукумат аъзоларидан беш нафарига нисбатан айблов қўйилган.
Ҳуқуқ-тартибот идоралари версиясига кўра, Юн Сок Ёл Жанубий Корея ҳарбий дронларини Шимолий Корея томон учиришни буюрган. Мақсад жанг ҳаракатларини қўзғатиш ва буни мамлакатда ҳарбий ҳолат жорий этиш учун баҳона сифатида ишлатиш бўлган. Айрим дронлар КХДР пойтахти Пхенян яқинига қулаган.
Терговчиларнинг фикрича, Юн ҳарбий маълумотларни узатиш орқали “душман манфаатларига хизмат қилган”. Ушбу ҳолат давлатга хиёнат ва исён аломатлари сифатида баҳоланмоқда.
Эслатиб ўтамиз, 2024 йил декабр ойи бошида бюджет бўйича сиёсий баҳслар фонида Юн Сок Ёл кутилмаганда мамлакатда ҳарбий ҳолат жорий этилишини эълон қилган эди. У бу қарорни мухолифатнинг “давлатга қарши фаолияти” билан изоҳлаган.
Бироқ Жанубий Корея парламенти мазкур қарорни қўллаб-қувватламаган ва давлат раҳбари эртаси куни уни бекор қилишга мажбур бўлган. 2024 йил 14 декабр куни парламент Юн Сок Ёлга импичмент эълон қилган, 2025 йил апрелида эса мамлакат Конституциявий суди ушбу қарорни тасдиқлаган.
Юн Сок Ёл 2025 йил 15 январ куни иккинчи уринишда ҳибсга олинган. Аввалига суд уни қамоққа олишни белгилаган бўлса-да, 8 март куни ҳимоя томонининг илтимосномаси қаноатлантирилиб, у қамоқдан озод этилган. Ҳозирда собиқ президентга нисбатан тергов ишлари давом этмоқда.
