Президент Администрацияси раҳбари Саида Мирзиёева Хитой Халқаро коммуникация маркази раиси Лонг Южсян билан учрашув ўтказди. Мулоқот давомида Ўзбекистон ва Хитой ўртасидаги ҳар томонлама стратегик шерикликни чуқурлаштириш ва кенгайтириш, шунингдек, икки давлат алоқаларининг долзарб йўналишлари муҳокама қилинди.
Таъкидланишича, Хитой Халқаро коммуникация маркази Ўзбекистон–Хитой муносабатларини ривожлантиришда муҳим платформа бўлиб хизмат қилмоқда. Учрашувда таълим, фан, маданият ва туризм соҳаларидаги алмашинувларни кенгайтириш масаласига алоҳида урғу берилди.
Томонлар яқин алоқаларни давом эттириш, қўшма ташаббусларни мувофиқлаштириш ва истиқболдаги лойиҳаларни биргаликда амалга ошириш зарурлигини қайд этди.
Бундан аввал Саида Мирзиёева ACWA Power компанияси раиси ва Vision Invest компанияси директорлар кенгаши аъзоси Муҳаммад Абунаян билан ҳам учрашув ўтказиб, энергетика, соғлиқни сақлаш ва рақамли технологиялар йўналишидаги лойиҳаларни муҳокама қилганди.
