Президент Шавкат Мирзиёев энергетика объектлари ва лойиҳаларини ишга тушириш маросимида сўзлаган нутқида иқтисодиёт ва аҳолининг ортиб бораётган талаби фонида энергетика тизими изчил ислоҳ қилинаётганини таъкидлади.
Давлат раҳбарининг айтишича, соҳада икки асосий мақсад белгиланган: барча ҳудудларни ишончли ва узлуксиз электр билан таъминлаш ҳамда бу жараённи замонавий, экологик тоза ва қайта тикланувчи энергия манбалари асосида амалга ошириш.
Сўнгги йилларда тизимга 35 миллиард доллар миқдорида хорижий инвестиция жалб этилди, 9 минг мегаватт янги қувватлар ишга туширилди. Натижада электр ишлаб чиқариш ҳажми 2017 йилдаги 60 млрд кВт/соатдан бу йил 85 млрд кВт/соатга етди.
Шунингдек, қарийб 5 минг мегаваттли қуёш ва шамол станциялари, 400 мегаваттли гидроқувватлар эксплуатацияга топширилгани маълум қилинди. Жами генерацияда “яшил” энергия улуши 2025 йилда 30 фоизга етказилиши кутилмоқда.
