Диққат билан тингланг — қуйидаги воқеалар мамлакатимизда коррупцияга қарши кураш қанчалик кескин ва изчил давом этаётганини яққол кўрсатади.
Жиззах — газ таъминоти тизимидаги пора
Жиззах шаҳрида “Ҳудудгаз Жиззах” филиали етакчи мутахассиси тузилган далолатномани бекор қилиш ва терговга қадар текширув бўйича жиноят иши қўзғатилмаслигини “ҳал қилиш” эвазига МЧЖ вакилидан 6 минг доллар талаб қилган. Мутахассис келишилган пулни филиал биноси олдида олаётганда ашёвий далиллар билан ушланган.
Жиззах вилояти — ФВБ бошлиғи
Туман Фавқулодда вазиятлар бўлими бошлиғи қурилиш лойиҳасини тасдиқлаш учун аввал 200 доллар, кейин хусусий мактаб лойиҳаси учун 6 миллион сўм пора олаётганда қўлга олинган.
Самарқанд — тиббиёт бирлашмасидаги камомад
Ургут туманида тиббиёт бирлашмасидаги 61 млн сўмлик камомад бўйича иш қўзғатилган. Текширувда ҳоким ёрдамчиси гумонланувчига ёрдам беришни ваъда қилиб 2 500 доллар олаётганда ушланади. Пулни олишда иштирок этган адвокат ҳам тезкор тадбирда қўлга олинган.
Тошкент вилояти — “Ягона буюртмачи хизмати”даги пора
Бекобод туманидаги янги МТТ қурилишида 176 млн сўм камомад аниқлангач, бош юрисконсульт текширув натижасини “ижобий ҳал қилиб бериш” учун МЧЖ раҳбаридан 8 400 доллар талаб қилган. У ҳам тезкор тадбирда ушланган.
Сирдарё — Ховос туманида икки нафар ИИБ ходими
Боғдорчилик МЧЖига оид ўғирлик бўйича 4 нафардан фуқаро мажбуран олиб кетилиб, улардан ишни ёпиш эвазига навбатма-навбат 55 млн сўм, 24 млн сўм ва қўшимча 11 млн сўм талаб қилинган.
ДХХ ва прокуратура ходимлари томонидан ўтказилган операцияда икки нафар ходим 11 млн сўмни олаётганда қўлга олинган.
Тошкент шаҳри — солиқ бош инспектори
Тўқимачилик МЧЖига қўшимча 8,7 млрд сўм солиқ ҳисоблангач, бош инспектор уни бекор қилиб бериш учун 5 минг доллар олган. Аммо бажаролмай, пулни қайтараётганида ДХХ томонидан ушланган.
Суд тизими — ҳакамлик суди судьяси
Судья икки фуқарони Жанубий Кореяга мавсумий ишчи сифатида юбориш эвазига 15 минг доллар, шундан 4 100 долларини аванс олган. Ваъдасини бажара олмагач, пулнинг бир қисмини қайтараётганда қўлга олинган.
Тошкент вилояти ва Тошкент шаҳри — ер савдоси билан боғлиқ пора ҳолатлари
1-ҳолат: Бир гуруҳ шахслар тадбиркордан ер ажратиш ва коммуникация рухсатлари учун 7,3 млн доллар талаб қилган. Тезкор тадбирда улар 160 минг доллар олаётганида ушланган.
2-ҳолат: Яшнобод тумани ҳокимлиги бош юрисконсульти суд қарори бўйича апелляция бермаслик учун 5 минг доллар сўраган. У 4 минг доллар олаётганда қўлга тушган.
Нурафшон шаҳри — ҳоким ёрдамчиси
У фуқарони Экология қўмитасига ишга жойлаб қўйиш эвазига 2 минг доллар талаб қилган. Пулни танишлари орқали олаётганда ДХХ томонидан ушланган. У илгари ҳам бир неча маротаба судланган.
Ушбу жиноятларни содир этган амалдорларнинг барчасига нисбатан жиноят ишлари қўзғатилиб, тегишли моддалар асосида жиноий жавобгарлик чоралари қўлланган.
