25 ноябрь куни имзоланган фармонга мувофиқ, Тошкентда экологик вазиятни яхшилаш юзасидан кечиктириб бўлмайдиган чора-тадбирларни бошқариб борувчи махсус комиссия шакллантирилди. Президент матбуот хизматига кўра, бу қарор пойтахтда кузатилаётган ҳаво ифлосланиши ва чанг миқдорининг кескин ошиб бориши ортидан қабул қилинди.
Бундан бир кун олдин Президент администрацияси раҳбари Саида Мирзиёева бошчилигида ўтган йиғилишда экологик муаммоларнинг илдиз сабаблари ва уларни бартараф этиш бўйича комплекс таклифлар муҳокама қилинган. Тақдим этилган таклифлар тезкор чоралардан тортиб, келгусида бундай ҳолатларнинг олдини олишга қаратилган узоқ муддатли ечимларни ҳам ўз ичига олади.
Йиғилишда экологик назоратни кучайтириш, ифлослантирувчи объектлар фаолиятини чеклаш, қурилишдаги талабларни қатъийлаштириш, шаҳарни кенг кўламда кўкаламзорлаштириш ҳамда ҳаво сифатини назорат қилишнинг замонавий тизимини жорий этиш вазифалари белгилаб берилди. Ушбу таклифлар асосида якунланадиган президент фармони лойиҳаси яқин кунларда давлат раҳбарига тақдим этилиши кутилмоқда.
Экология қўмитаси раҳбари Хайрулла Ғаффоровнинг таъкидлашича, бугунги муаммо бир неча йиллар давомида шаклланган жараёнлар билан боғлиқ бўлиб, асосий омиллар сифатида иқлим ўзгариши, саноат ва иссиқлик манбалари чиқиндилари, шунингдек, транспортдан тарқалувчи моддалар кўрсатилмоқда. Унинг айтишича, ёғингарчиликнинг камайиши ва шамол ҳаракатининг сустлиги чангнинг ҳавода узоқ сақланиб қолишига олиб келмоқда.
