Кеча, 19 ноябрь куни Ўзбекистон Савдо-саноат палатасида АҚШнинг Нью-Йорк шаҳри мэри Эрик Адамс бошчилигидаги делегация билан учрашув бўлиб ўтди.
учрашувда палата раисининг маслаҳатчиси Умид Сафаров, Ўзбекистоннинг етакчи тадбиркорлари ҳамда бир қатор бизнес уюшмалари вакиллари иштирок этган.
Учрашувда томонлар ўзаро савдо-иқтисодий ҳамкорликни янада чуқурлаштириш, қўшма кооперация лойиҳаларини ривожлантириш ва икки ҳудуд ўртасидаги бизнес алоқаларни кенгайтириш масалаларини муҳокама қилган.
Учрашув давомида Умид Сафаров томонидан ўзбекистонлик тадбиркорларни АҚШ капитал бозорларига тайёрлаш мақсадида Нью-Йорк фонд биржаси билан ҳамкорлик ўрнатиш, мамлакатда АҚШнинг етакчи университетлари билан бизнес мактаби ва акселерация дастурлари яратиш, шунингдек, Тошкентда қўшма касб-ҳунар коллежини очиш таклиф этилган.
Кичик бизнес уюшмаси раиси Камолат Мирзаалиева эса Нью-Йорк кичик бизнес бирлашмаси билан ҳамкорлик ўрнатиш ва маҳаллий маҳсулотларни АҚШ бозорига экспорт қилишда кўмак сўраган.
Тадбиркорлар томонидан қишлоқ хўжалиги маҳсулотларини Америка бозорига етказиб беришни кенгайтириш, биокимёвий маҳсулотлар ишлаб чиқариш ва инновацион лойиҳаларни ривожлантириш бўйича таклифлар билдирилган.
“Учрашув конструктив руҳда ўтиб, икки томонлама бизнес ҳамкорликни янги босқичга олиб чиқишга хизмат қилиши кутилмоқда”, дейилади хабарда.
