АҚШ Давлат департаменти виза беришни рад этиш мумкин бўлган сабаблар рўйхатига семизлик, саратон, юрак ва қандли диабет каби касалликларни киритди. Янги кўрсатма 2025 йил ноябрида барча дипломатик ваколатхоналарга юборилган.
“The Washington Post”нинг ёзишича, Давлат департаменти консуллик ходимларига ариза берувчиларнинг соғлиғи виза масаласида муҳим омил эканини эслатган. Ҳужжатда айрим касалликлар — юрак-қон томир, нафас йўллари касалликлари, саратон, диабет ва руҳий ҳолат билан боғлиқ муаммолар — аризачининг даволаниши “юз минглаб доллар” талаб қилиши мумкинлиги қайд этилган.
Кўрсатмада семизлик ҳам рад этиш эҳтимолини оширувчи омил сифатида тилга олинган. Сабаби, у астма, уйқу апноэси, қон босимининг кўтарилиши ва депрессия каби муаммоларни келтириб чиқариши мумкин.
Янги қўлланма аризачининг АҚШда даволаниш учун етарли маблағига эгалигини текширишни, шунингдек, давлат ёрдамига муҳтож бўлиш эҳтимолини баҳолашни ҳам талаб қилади. “KFF Health News” ёзишича, бундай мезонлар аризачининг “жамият учун тўсиқ” бўлишининг олдини олишга қаратилган.
Давлат департаментидаги айрим манбаларнинг “Washington Post”га маълум қилишича, мактуб сиёсий раҳбарият томонидан тайёрланган ва одатдаги эксперт текширувидан ўтмаган.
Оқ уй вакиллари эса янги ёндашув 100 йиллик амалиётга асосланишини, солиқ тўловчилар зиммасига ортиқча молиявий юк тушмаслигини таъминлашга қаратилганини таъкидлаган.
