Британиянинг BBC телерадиокорпорацияси АҚШ президенти Дональд Трампдан расмий узр сўради. Қайд этилишича, ўтган йили эфирга узатилган “Панорама” дастурида 2021 йил 6 январдаги Трамп нутқидан парчалар монтаж жараёнида бирлаштириб юборилган.
Бу эса у тарафдорларини Капитолийга бостириб киришга бевосита чақиргандек тасаввур уйғотган.
Монтаж қилинган версияда “Биз Капитолийга борамиз, мен сизлар билан биргаман ва биз курашамиз” деган жумлалар тўхтовсиз кетма-кет қўйилган. Аслида эса бу иборалар нутқда бир-биридан тахминан бир соат фарқ билан айтилган.
BBC раиси Самир Шаҳ бу ҳолат “зўравонликка даъват каби нотўғри таассурот” келтириб чиқарганини тан олиб, Оқ уйга шахсан хат юборган. Корпорация мазкур дастур эндиликда қайта намойиш этилмаслигини ҳам маълум қилган.
Трампнинг адвокатлари BBC раддия ва узр сўрамаса, 1 миллиард долларлик товон пули талаб қилиб судга мурожаат қилишини айтган эди. Корпорация узр сўради, аммо компенсация тўлашдан бош тортди.
