Инвестициялар, саноат ва савдо вазирлиги Чорвоқдаги “Sea Breeze Uzbekistan” лойиҳаси юзасидан кенг жамоатчиликда пайдо бўлган саволларга жавоб берди.
Маълум қилинишича, лойиҳа инвестори Agalarov Девелопмент компанияси инфратузилма учун 240 миллион доллар тўлов амалга оширади ва канализация тизимини ўз ҳисобидан қуради. Оқова сувлар Чорвоққа эмас, балки Чирчиқдаги тозалаш иншоотларига йўналтирилади.
Шунингдек, лойиҳа тўлиқ хусусий маблағлар ҳисобига амалга оширилади, бюджетдан маблағ ажратилмайди. Қурилиш экологик стандартлар асосида ва давлат назорати остида олиб борилади.
Вазирлик вакилининг қайд этишича, лойиҳада минглаб иш ўринлари яратилади, мактаб ва шифохоналар қурилади ҳамда ҳудуд экологик жиҳатдан ободлаштирилади.
