Кеча, 31 июль куни соат 16:00 да 23 ёшли С.Д. таниши билан ҳордиқ чиқариш учун Мирзо Улуғбек туманидаги "Янги Ўзбекистон" боғида жойлашган "Орзулар соҳили" дам олиш масканига бориб, чўкиб кетди.
Билдирилишича, пляждаги ташриф буюрувчилардан бири С.Д.нинг сувда ҳаракатсиз ҳолатда, боши сувга ботган ҳолда турганини пайқаган. Эркак унинг олдига сузиб бориб, қирғоққа олиб чиққан.
Сўнг воқеа жойига дам олиш масканининг шифокорлари чақирилган, бироқ кўрсатилган тиббий ёрдамга қарамасдан, С.Д. вафот этган. Суд-тиббиёт экспертининг дастлабки хулосасига кўра, марҳум ўлимига нафас йўлларининг сув билан тўсилиб қолиши натижасида юзага келган механик асфиксия сабаб бўлган.
Ҳозирда мазкур ҳолат юзасидан терговга қадар текширув ишлари олиб борилмоқда.
