АҚШ БМТга Трамп Украинадаги урушни 8 августга қадар тугатиш бўйича келишувга эришмоқчи эканини билдирди. Бу ҳақда Reuters хабар берди.
Агентликнинг хабар беришича, бу ҳақда Қўшма Штатларнинг юқори мартабали дипломати Жон Келли БМТ Хавфсизлик Кенгашининг 15 аъзосига маълум қилган.
"Россия ҳам, Украина ҳам ўт очишни тўхтатиш ва мустаҳкам тинчликка эришиш бўйича келишувга эришиши лозим. Тинчлик битимини тузиш вақти келди. Президент Трамп бу 8 августгача амалга оширилиши кераклигини аниқ билдириб ўтди. Қўшма Штатлар тинчликни таъминлаш учун қўшимча чоралар кўришга тайёр", – деди америкалик дипломат.
Эслатиб ўтамиз, аввалроқ Трамп Украинада ўт очишни тўхтатиш бўйича Россияга 10 кун муҳлат берилишини ва бу 29 июлдан бошлаб ҳисобланишини эълон қилганди. Қўшма Штатларнинг БМТдаги баёнотидан келиб чиқилса, Вашингтон 8 августни ушбу ултиматумга жавоб бериш учун охирги кун деб ҳисобламоқда.
