Камбоджа бош вазири Хун Манет ва Таиланд бош вазири вазифасини бажарувчи Пхумтам Вечаячай ўт очишни зудлик билан тўхтатишга тайёрлигини билдирди, дея маълум қилди музокараларда воситачилик қилган Малайзия бош вазири Анвар Иброҳим. Келишув маҳаллий вақт билан 29 июль куни ярим тундан бошлаб кучга киради. Бу ҳақда BBC News хабар берди.
"Бу кескинликни юмшатиш ва тинчлик ва хавфсизликни тиклаш йўлидаги муҳим биринчи қадам", — деди Анвар матбуот анжуманида. Унинг сўзларига кўра, икки давлат ҳарбий амалдорлари сулҳ келишуви кучга кирган куннинг эртасига "норасмий учрашув" ўтказади.
Хун Манет музокараларни "жуда яхши учрашув" деб атади ва жангларни "зудлик билан" тугатишга умид билдирди. У Малайзия раҳбари, АҚШ президенти Дональд Трамп ва Хитой ҳукуматига можарони ҳал қилишда воситачилик қилгани учун миннатдорлик билдирди. У, шунингдек, Вечаячайнинг музокаралардаги "конструктив" иштирокини юқори баҳолади.
Таиланд бош вазири музокаралар "яхши ниятда" ўтганини ва унинг мамлакати тинчлик тарафдори эканини айтди.
Матбуот анжуманидан сўнг уч етакчи бирлик белгиси сифатида қўл сиқишди.
Таиланд ва Камбоджа раҳбарларининг учрашуви АҚШ президенти Дональд Трамп икки давлат Вашингтон билан савдо музокаралари учун дастлабки шарт сифатида ўт очишни тўхтатишга рози бўлишни таклиф қилганидан кейин бўлиб ўтди, деб ёзади BBC News.
