Трамп, Путин ва Си Жинпин сентябр бошида Хитойда учрашиши мумкин. Бу ҳақда Тhe Times нашри хабар берди.
"Хитой 3 сентябр куни Пекиндаги Тяньаньмень майдонида Иккинчи жаҳон уруши якунланганининг 80 йиллигини ҳарбий парад билан нишонлаш режалари ҳақида эълон қилган, Владимир Путин бу тадбирда иштирок этиш учун таклифни аллақачон қабул қилган", дея ёзмоқда газета.
Уруш даврида Хитой ва АҚШ яқин иттифоқчилар бўлган ва ҳозирда Хитойда Си, Трамп ва Путин ўртасида учрашув ташкил этиш имкониятидан фойдаланиш бўйича чақириқлар янграмоқда.
Япониянинг Кyodo агентлиги хабарига кўра, Хитой раҳбарияти Трампни мазкур тадбирга таклиф этиш ҳақида аллақачон қарор қабул қилган.
"1941 йилдан 1945 йилгача Хитой ва АҚШ Япония милитаризми билан курашда иттифоқчи бўлган. Агар президент Трамп Хитойга ташриф буюриб, 3 сентябр парадида иштирок этса, бу дунёга кучли ижобий сигнал бўлади. Хитой, Россия ва АҚШ раҳбарларининг ёнма-ён туриши тинчлик ва барқарорликнинг кучли рамзига айланиши мумкин", дейилади Тhe Times мақоласида.
Таъкидлаш жоизки, айнан сентябр бошида Трамп томонидан Путинга Украинада ўт очишни тўхтатиш бўйича берилган 50 кунлик ултиматум муддати тугайди.
