Жорий йилнинг 22 июлидан бошлаб YouTube мустақил равишда жонли эфир олиб бориш учун минимал ёш чегарасини 16 ёшга кўтармоқда.
13–15 ёшли ўсмирлар стрим қилишни фақат катта ёшли шахс ҳамроҳлигида амалга оширишлари мумкин. Акс ҳолда, улар чат ва бошқа функцияларга кириш имконидан маҳрум бўлиши мумкин.
YouTube жорий йил 22 июлдан бошлаб хавфсизлик сиёсатида жиддий ўзгаришлар киритаётганини эълон қилди: 16 ёшгача бўлган фойдаланувчилар катта ёшли шахс кадрда кўриниб турмаса ва каналда менежер, таҳрирчи ёки эгаси сифатида рўйхатдан ўтмаган бўлса, мустақил равишда жонли эфир ўтказа олмайди.
Агар қоида бузилса:
- чат ёпилади;
- эфир функциялари чекланади;
- жонли эфир ўчирилиши мумкин.
Қоидаларни четлаб ўтиш (масалан, бошқа канал орқали эфир уюштириш) тақиқни бузиш деб ҳисобланади ва аккаунтнинг ёпилишига олиб келиши мумкин.
YouTube ўзгаришлар сабабини расман ошкор этмаган бўлса-да, бу қадам катталар ҳамроҳлигисиз жонли эфирлардаги хавфлар — шахсий маълумотларнинг тарқалиши, чатда нохуш мулоқотлар ва бошқа хатарлардан ўсмирларни ҳимоя қилишга қаратилгани айтилади.
YouTube таъкидлаганидек, стрим — “олдиндан башорат қилиб бўлмайдиган формат” ҳисобланади ва у алоҳида назоратни талаб қилади.
Платформа фикрига кўра, бу ўзгаришлар янги блогерлар учун қийинчилик туғдириши мумкин, аммо болалар хавфсизлиги ҳар қандай натижадан устундир.
