Сўнгги ўн йилликда Россияда Германияга нисбатан муносабат кескин ўзгарди. “Левада-маркази” томонидан ўтказилган сўров натижаларига кўра, россияликларнинг 55 фоизи айнан Германияни ўз мамлакатига энг душман давлат деб ҳисоблаган.
Бу кўрсаткич 10 йил аввал атиги 3 фоизни ташкил этган, Қримнинг аннексиясидан сўнг эса 20 фоиз атрофида бўлган. Аввалги икки ўн йилликда эса “асосий душман” дея АҚШ номи тилга олинарди.
Немис тарихчиси Маттиас Ул эса бу борадаги ўзгаришларни икки асосий сабаб билан изоҳлайди. “ДW” нашрига берган интервьюсида у, аввало, АҚШда Доналд Трампнинг ҳокимиятга қайтишини, у орқали муросага эришиш умидларининг кучайишини тилга олди. Иккинчи муҳим омил сифатида эса Германия ҳукуматининг Украинага қатъий қўллаб-қувватлов кўрсатганини кўрсатади.
Тарихчининг фикрича, Россияда тобора авторитар бошқарув кучайиб бораётган бир пайтда, ҳатто мустақил сўровлар ҳам одамларнинг ички қўрқувлари сабаб аниқ ҳақиқатни кўрсатмаслиги мумкин.
“Аммо агар сўров натижаларини чуқурроқ таҳлил қилсак, бу душман образининг шаклланишида оммавий пропаганданинг ўрни беқиёслигини кўриш мумкин. Аксарият россияликлар асосий ахборотни айнан телевизор орқали олади”, — дейди тарихчи.
Маттиас Улнинг таъкидлашича, Россия пропагандачилари Германияга нисбатан эски стереотипларга осонгина мурожаат қилиши мумкин. Чунки бу мамлакат Иккинчи жаҳон уруши даврида СССРнинг бош душмани бўлган.
“Бу пропагандада ишлатиш учун қулай андоза. Ўша эски тугмани босиш кифоя. Бу Франция ёки Буюк Британия учун қилинадиган иш эмас”, — дея изоҳ беради у.
Шунга қарамай, тарихчи Германия ҳақидаги салбий образ узоққа бормаслигига ишонади. “Агар келажакда тинчлик келишуви имзоланса, бу сунъий душман образи дарҳол ўзгаради. Мен бунга деярли аминман”, — дея якунлайди Ул.
