Бугун, 10 июнь куни Австриянинг жануби-шарқидаги Грац шаҳридаги мактабда отишма юз берди. Оқибатда камида 8 киши ҳалок бўлди, шунингдек, бир неча киши яраланди. Бу ҳақда “Kronen Zeitung” хабар берди.
Нашрнинг ёзишича, қурбонлар орасида ўқувчилар ҳам, ўқитувчилар ҳам бор. Бундан ташқари, “Heute” нашри тўққиз кишининг ўлганини, “Kurier” эса ўн нафар одамнинг ўлганини хабар қилмоқда. Ички ишлар вазирлиги “Der Standard” нашрига бир неча киши ҳалок бўлганини маълум қилган, бироқ уларнинг сонига аниқлик киритмаган.
Дастлабки маълумотларга кўра, ҳодисада ҳужумчи ҳам ҳалок бўлган. “Kurier”нинг ёзишича, у мактаб ўқувчиси бўлган ва ўз жонига қасд қилган. Ўқувчи икки синф хонасида ўт очган. “Kronen Zeitung” у зўравонлик қурбони бўлганини айтмоқда.
Пойтахти Грац бўлган Штирия штати полицияси Драйершютценгасседаги Федерал олий мактаб-гимназиясида (BORG) операция ўтказилганини маълум қилди. Бино ичида отишма овозлари эшитилган. Операцияга “Кобра” махсус кучлари ва вертолёт жалб қилинган.
Ҳозирда мактабдаги вазият хавфсиз, у ердаги одамлар эвакуация қилинган.
