13 апрель эрталаб Россия томонидан Украинанинг Суми шаҳрига уюштирилган ракета ҳужуми оқибатида 21 киши ҳалок бўлди, 83 нафари эса турли даражадаги тан жароҳатларини олди. Бу ҳақда Украина ички ишлар вазири Игор Клименко маълум қилди, дея ёзмоқда "Замон.уз".
Зарбалар оқибатида ўнлаб бинолар вайрон бўлган, маҳаллий тармоқларда ёнаётган машиналар ва транспорт воситаларининг видеолари тарқалди.
Украина президенти Владимир Зеленский бу ҳужумни "оддий одамларнинг тинч ҳаётига қилинган зарба" дея баҳолаб, ҳалок бўлганларнинг яқинларига ҳамдардлик билдирди.
"Бу ҳужум якшанба куни — одамлар дам оладиган, черковларга борадиган пайтда рўй берди", — деди у.
Зеленский, шунингдек, АҚШ, Европа ва бошқа давлатларни Россиянинг бу ҳаракатларига кескин ва қатъий жавоб қайтаришга чақирди. Унинг таъкидлашича, Россияга қарши реал босим бўлмас экан, уруш тугамайди.
