Россия ҳукумати бензин ишлаб чиқариш билан шуғулланмайдиган компаниялар учун бензин экспортига қўйилган тақиқни 1 мартдан 31 августгача узайтирди. Тегишли қарорни бош вазир Михаил Мишустин имзолади.
Чеклов нефть маҳсулотлари ишлаб чиқарувчиларнинг ўзлари томонидан амалга ошириладиган етказиб беришларга нисбатан татбиқ этилмайди.
Расмийлар тақиқнинг узайтирилишини ички ёнилғи бозорини барқарорлаштириш, нефтни қайта ишлаш саноатини қўллаб-қувватлаш ва "кулранг" экспортга қарши курашиш зарурати билан изоҳлади.
Росстат маълумотларига кўра, 4 февралдан 24 февралгача ёнилғи нархи бир неча марта ошган, бироқ 26 февраль куни Санкт-Петербург халқаро товар-хомашё биржасида Аи-92 ва Аи-95 нархлари мос равишда 0,33 ва 0,83 фоизга арзонлаган.
Бензин экспортига тақиқ 2024 йил февраль ойида жорий этилганди. Дастлаб у 1 мартдан 31 августгача давом этиши тахмин қилинган эди. Чеклов ЕОИИ мамлакатларидан ташқари ҳар қандай мамлакатларга бензин етказиб беришни тақиқлаган. Қарор ёнилғи бозорида талаб юқори бўлган даврда «барқарор вазиятни сақлаб туриш» билан изоҳланган.
Чекловлар май ойида ички бозорнинг тўйиниши ва Украина дронлари ҳужумлари туфайли зарар кўрган нефтни қайта ишлаш заводларида режадан ташқари таъмирлаш ишлари якунлангани сабабли вақтинча олиб ташланган.
