Президент топшириғи билан Ўзбекистондаги мактаб ва боғчаларда бепул йод препаратларини тарқатиш йўлга қўйилди. Хўш, бу модда инсон организми учун шунчалик фойдалими? Тиббиёт фанлари доктори, профессор, РИИАТ Эндокринология маркази илмий ишлар буйича директор ўринбосари З.Ю.Халимова шу саволга жавоб берди.
— Йод инсон организми учун муҳим микроэлемент ҳисобланади. Авваламбор, йод инсон танасидаги энг муҳим эндокрин без-қалқонсимон безнинг гормонлар ишлаб чиқишидаги асосий модда ҳисобланади. Қалқонсимон без гормонлари танадаги модда алмашинувини бошқарувчи омил бўлибгина қолмай болалар ва ўсмирларнинг жисмоний, ақлий ва жинсий ривожланишида муҳим ўрин тутади. Тиреоид гормонлар хомиланинг нерв ҳужайраларининг ривожланишидан бошлаб инсоннинг бутун ҳаёти давомида муҳим роль ўйнайди. Йод етишмовчилик натижасида болалар ва ўсмирларларда ақлий ва интеллектуал етишмовчиликдан кретинизмгача, жисмоний ривожланишдан орқада қолишдан пастбуйликкача, эндемик ҳамда тугунли буқоқ, қалқонсимон без гормонлари етишмовчилиги- гипотиреоз каби чуқур ўзгаришларга олиб келади.
Одатда йод етишмовчилиги болалар ва ўсмирларда яққол ташқи белгиларга эга бўлмасада, кўпинча ҳолсизлик, тез чарчаш, бош оғриғи, иштаҳа пасайиши, кайфиятнинг ўзгарувчанлиги, қизиқишларини пасайиши билан кечади. Болалар ва ўсмирларда ўқиш қобилияти пасаяди, ақлий топшириқларни қийинлик билан бажаришади, хотираси сусайиб, уйқучанлик пайдо бўлади
Бу белгилар йод танқислик ҳолатларининг илк белгиларидир. Агарда йод танқислик ҳолати ўз вақтида ҳал этилмаса бундай болаларда келажакда тиклаб бўлмайдиган - интеллектуал, жисмоний, жинсий, руҳий асоратлар ривожланади.
Шунинг учун оғир йод танқислик ҳолати ўрин тутган Ўзбекистонимизда халкимиз келажаги йулида биз бугун қайғуриб, фарзандларимизни бу оғир асоратлардан асрашимиз ва уни олдини олишимиз зарур. Яъни болалар ва ўсмирлар мунтазам равишда йод сақловчи дори воситалари билан узоқ вақт давомида таъминланиши зарур!!!
