Ўзбекистон ва Нагоя шаҳри ўртасида дўстлик алоқаларини ривожлантириш, икки томонлама иқтисодий, маданий-гуманитар алоқалар кўламларини янада кенгайтириш ҳамда Аичи префектурасида истиқомат қилаётган мамлакатимиз фуқароларини ҳар томонлама қўллаб-қувватлаш мақсадида Ўзбекистоннинг Нагоя шаҳрида Фахрий консуллиги очилди. Бу ҳақда "Дунё" АА мухбири хабар бермоқда.
Ўзбекистоннинг Токиодаги дипломатия ваколатхонаси маълумотига кўра, жорий йил 19 сентябрь куни бўлиб ўтган янги Фахрий консулликнинг очилиш маросимида Ўзбекистон Республикасининг Нагоя шаҳридаги Фахрий консули этиб тайинланган "IM Corporation" компанияси маслаҳатчиси, "Нагоя-Ўзбекистон" дўстлик ассоциацияси маслаҳатчиси Хироюки Итога тегишли консуллик патенти тантанали топширилди.
Маросимда Япония парламенти, вазирликлари, Аичи префектураси, Нагоя шаҳри маъмурияти ва депутатлари, Япония халқаро ҳамкорлик агентлиги (JICA), Япония ташқи савдо ташкилоти (JETRO), Нагоя савдо-саноат палатаси, қатор йирик компаниялар, университетлар, жамоатчилик ташкилотлари вакиллари, Нагоя шаҳрида жойлашган дипломатия корпуси вакиллари ҳамда ушбу ҳудудда яшаётган ватандошларимиз иштирок этишди.
Тадбирда сўзга чиққан Япония томони вакиллари янги ташкил этилган Ўзбекистоннинг Нагоя шаҳридаги Фахрий консуллиги мамлакатимиз Президенти Шавкат Мирзиёвнинг 2019 йил декабрь ойида Нагоя шаҳрига ташрифининг амалий натижаларидан бири бўлганини қайд этдилар. Шунингдек, Ўзбекистоннинг Аичи префектураси ва Нагоя шаҳри билан дўстона алоқаларни ривожланиш ва икки томонлама иқтисодий, савдо, маданий, илмий-техникавий, миграция ва консуллик алоқаларини чуқурлаштиришга кўмаклашиш, халқ дипломатияси ҳамкорлиги, фуқаролар ўртасидаги дўстлик ришталарини мустаҳкамлаш, Аичи префектурасида таҳсил олаётган ва компанияларда фаолият олиб бораётган Ўзбекистон фуқароларининг ҳуқуқлариини ҳимоя қилишда катта ўрин тутиши алоҳида таъкидланди.
Жумладан, Япония парламенти қуйи палатаси Қонунчилик ва суд масалалари қўмитасининг раиси Тадахико Ито ўзи истиқомат қиладиган шаҳарда Ўзбекистоннинг Фахрий консуллиги очилишидан жуда мамнунлигини маълум қилди. У Ўзбекистон Президентининг 2019 йилда Нагоя университетига ташрифи ва унга ушбу университетнинг фахрий доктори унвони берилиши икки томонлама таълим, иқтисодий ва маданий алоқалар ривожининг гарови эканлигини қайд этди.
У Аичи префектурасида истиқомат қилаётган 500 нафардан ортиқ ватандошларимиз ва япон туристларини Ўзбекистонга кенг жалб қилиш мақсадида Фахрий консуллик билан биргаликда "Нагоя-Тошкент" ҳаво қатновларини тиклаш ва чартер қатновларини ишлаб чиқишга эҳтиёж катта эканлигини айтди.
Япония парламенти қуйи палатаси депутати, "Япония-Ўзбекистон" парламент лигаси аъзоси, собиқ иқтисодиёт ва саноат вазири ўринбосари Ясумаса Нагасака худудлараро ҳамкорлик ва дўстлик алоқаларини ривожлантириш мақсадида янги консуллик фаолиятини ҳар томонлама қўллаб-қувватлашини ҳамда Ўзбекистон билан стратегик ҳамкорликни ривожлантириш учун Япония парламенти ва ҳукумати томонидан ёрдам кўрсатишга тайёр эканлигини маълум қилди. У Япония парламенти ва ҳукуматига Ўзбекистон билан стратегик ҳамкорликни ривожлантиришни қўллаб-қувватлашда кўмак кўрсатишини таъкидлади.
Нагоя шаҳри мэри Такаши Кавамура Ўзбекистон Президенти Шавкат Мирзиёев билан 2019 йил декабрдаги учрашувини илиқ хотиралар экан, Нагоя-Ўзбекистон дўстлик алоқалари фаол ривожланаётганидан, икки давлат фуқаролари ўртасидаги дўстлик ришталари мустаҳкамланаётган ҳамда қўшма делегациялар, иқтисодий ва маданий миссиялар, мактаб ўқувчилари ва санъаткорлар алмашуви йўлга қўйилганлигидан мамнуният изҳор этди. У Ўзбекистоннинг Нагоя шаҳридаги Фахрий консуллиги билан ҳамкорликда икки томонлама ҳамкорликни кенгайтиришга йўналтирилган барча саъй-ҳаракатларни қўллаб-қувватлашини алоҳида таъкидлади.
Эслатма: ҳозирги кунларда Ўзбекистоннинг турли хорижий мамлакатларда 40 га яқин фахрий консулликлари фаолият кўрсатмоқда.
