Президентнинг 2022 йил 31 августдаги 213-сон фармонида қорақалпоғистонлик ёшлар учун давлат гранти асосида 3 000 та, тўлов-контракт асосида 6 500 та қўшимча квота ажратилиши белгиланган.
Мазкур Фармон ижроси юзасидан Давлат комиссиясининг навбатдаги баёнида қорақалпоғистонлик ёшлар учун туманлар кесимида тармоқ соҳалари бўйича олий маълумотли кадрларга бўлган эҳтиёжни инобатга олган ҳолда бакалавриат таълим йўналишлари кесимида:
- республика давлат олий таълим муассасаларига – давлат гранти асосида 3 000 та;
- вилоятлардаги давлат олий таълим муассасаларига – базавий тўлов-контракт асосида 6 500 та қўшимча қабул параметрлари тасдиқланди.
Бунда:
- давлат гранти асосидаги қабул параметрлари – кириш имтиҳонларида 68,0 балл ва ундан юқори балл тўплаган, лекин давлат гранти асосида талабаликка тавсия этилмаган абитуриентлар ҳисобидан;
- базавий тўлов-контракт асосидаги қабул параметрлари – кириш имтиҳонларида 56,7 балл ва ундан юқори балл тўплаган, лекин талабаликка тавсия этилмаган абитуриентлар ҳисобидан шакллантирилди.
Қўшимча қабул параметрлари доирасида талабаликка тавсия этилган қорақалпоғистонлик ёшлар тавсия этилганлик ҳолатини my.uzbmb.uz сайти орқали шахсий кабинетидан билишлари мумкин.
Шунингдек, олий таълим муассасаларига танлов қайдномалари етказилган.
