“Дунё бўйлаб” телеканали журналисти вафот этди. Бу ҳақда Бош прокуратура ахборот хизмати хабар берди.
Маълум бўлишича, жорий йилнинг 12 сентябрь куни соат тахминан 20:30 атрофида Тошкент шаҳар, Чилонзор туманида яшаган 1992 йилда Тошкент шаҳрида туғилган Я.Р. исмли шахс (аёл киши) Чилонзор тумани, Муқимий кўчасида жойлашган «DOCTOR SERVIS» хусусий клиникасида даволанаётган онаси 1970 йилда Тошкент шаҳрида туғилган Я.Л.ни ҳолидан хабар олгани борганда, Я.Р.нинг томоғи оғриганлиги сабабли, ўзини ёнида бўлган “Тайгерон левофлоксацин” (антибиотик) дори воситасидан 1 дона таблетка ичиб, тахминан 10-15 дақиқалардан сўнг тутқаноғи тутиб, ҳушидан кетган.
«DOCTOR SERVIS» хусусий клиникасида шифокор реаниматолог лавозимида ишловчи шифокор биринчи ёрдам кўрсатган ва Я.Р. реанимация бўлимига ётқизилган. Олиб борилган даво муолажалар натижасида Я.Р. ҳушига келиб аҳволи яхшиланган.
Шундан сўнг, 2023 йил 13 сентябрь куни соат тахминан 16:00 атрофида Я.Р.ни такроран тутқаноғи тутиб қолган. Кўрсатилган тиббий даво муолажаларига қарамай, шу куни соат тахминан 17:50 да Я.Р.да биологик ўлим ҳолати қайд этилган.
Суд-тиббий экспертизасининг 2023 йил 14 сентябрдаги 913-сонли маълумотномасига кўра, Я.Р.нинг ўлими «Доридан (левофлоксацин) аллергик реакция. Бош мия, ўпка ўткир шиши. Ўткир нафас юрак қон томир етишмовчилиги. Анафилактик шок» туфайли юзага келганлиги аниқланган.
Мазкур ҳолат юзасидан туман прокуратураси томонидан терговга қадар текширув ҳаракатлари олиб борилмоқда.
